بعد ما حاجة يذبح بينة الافغاني
ولا عبوة بدرب يزرعلي جيراني
ولا يدخل يهودي ولا امريكاني
إحنة إخوان واحد يذبح الثاني
بير التفرقة حفرته الأمريكان
وأدري وما طحت بس هوة جرّاني
ست سنين يذبح وانه راسي بچيس
وابجنطة الجسد وبجنطة ذرعاني
خذت عمرك حكم بسّك بعد شتريد
تظل ابن القصر وابن الگصب آني ؟؟
وتظل البصرة عاجر وام ولد تكريت ؟
وتظل تنگل حطب لديالى ميساني ؟
وتظل انته العجل وآنه اليول للموت ؟
وأظل بلا اظافر وانته سجّاني ؟
وتظل وية العرب واخواني ذول اتگول ؟
ويسئلونك علي وتگلهم ايراني ؟
باوع على اخوانك بيّة شيسوون
وشوف شلون اخوك ايرجّع احساني
يعوف اختي بعبوتة امكشفة اعلى الگاع
يتفرّج عليها القاصي والداني
وانه الكل اعربيّة اتكشفت هدّيت
واغطّيها بقميصي والبس الثاني
من هدّوا عليك وطبّو العمّان
ما گلتلك اختك هذا غطـّاني ؟؟!!
وآنه لو ما شريف اليوم ارد ردود
وانزعهن واگلهن ذنّة قمصاني
عمر اعلف عليكم والشعب جوعان
ويلوموني واگلهم ذول فرساني
تالي تهد علي وحصاني ميّت جوع
والله تندّمت لو عالف حصاني
لإمريكا شلع كلكم حنيتو الراس
وعذرتوا ارواحكم وتعيّرت آني
أنه صح دنگت گدام الامريكان
ولكن دنگت شدّيت قيطاني
ولإن شيعي الحكم ادفع ضريبة تريد ؟
وآنه شحصلت والشيعي شنطاني ؟
انكسر گلبة اعلى كوخي وگال اهدمة اليوم
وابنيلك قصر وتسكنة بس تاني
واتاني وصار خمس اسنين
وانته من القصر طابوگة ما باني
بيت الطين يرجف واهمه عرگانين
وصورهم لزّگوهه بطين حيطاني
شعارات اعلى بيتي يدگله طول اقماش
وانه بعازة گماط ايغطي رضعاني
رد لفندقك والجبته اخذة وياك
ماريد القصر ردني اعلى بنياني ...!!
03.04.08 5:14
